شحال فالساعة

شحال فالساعة
قال الراجل
للشاب العاطل
جاوبو
اسيدي ما عندي ساعة
عايش وقتي ساعة بساعة
الافق مسدود
الامل مفقود
وحيلي مهدود
من قبل كانت عندي ساعة
كنت منضبط ووقتي مضبوط
كنت عايش وقتي بالدقيقة والساعة
كنت تلميذ يجد و يكد
صبحت طالب نتائج متفوقة يحصد
تخرجت وحزت دبلوم كبير
فرحو حبابي كبير و صغير
زفوني بالغيطة و البندير
قالو لي
افرح وسعد
غدا تصبح وزير
من هبالي صدقتهم
تخيلت نفسي مسؤول كبير
انا نآمر و الغير عليه بالطاعة
دازت ايام وطال الزمان
سولوني الناس
فاين خدام اشنو كتدير
أنا عاطل هاد الساعة
مانا وزير مانا مدير
مانا شاوش فجماعة
طلباتي رفضوها بدون تبرير
ما خدموني فوزين
ما قبلوني فزراعة
فكرت نهاجر
كبف نعمل وبا فقير
قلت نحرك
عييت من التفكير
جمعت رحيلي
ودعت خليلي
قاومت الحنين وقصدت البحر
قبل ما نغامر
بديت نفكر
طاح فبالي
با و مي وما بلغو من العمر
جبرت نفسي
على فراق الحباب منقدر
رجعت لداري
نواسي راسي بالصبر
قررت
انا بلادي ما نهجر
فيها نجد و نكد
فيها نحفر بضفاري الصخر
وما نكون عبد لحد
نكون سيد راسي
ويدي للغير ما تتمد
وخا نموت بالمجاعة
والان خليني فحالي
بدل ساعة بساعة
راني ما عندي ساعة
من قبل كانت عندي ساعة

الأخ حسن بواريق

يسرني أن أصافحك عبر هذا النص

طبعا المعطلون لا وزن للوقت عندهم

حتى مفهوم الزمن يكاد يكون منعدما

بسبب الآلام والأوجاع المتراكمة

مودة كبيرة