عيطي يا بلادي عيطي

عيطي يا بلادي عيطي
نوحي يا بلادي و اشكي
من دموع محبتي درتها عيون
تدر رمال ذهبية من حر شوقي ليها
من دمي خليتها عيون ساقية حمراء
بين جبال و صحار تلالي
تقول يا كانا مغربية
عيطي يا بلادي و نوحي
زمان ولادي من كل واد طلوا علي
و شدوا طريق المحاين
قالوا نطردو من بلادنا ولد الرومية
نسقي ارضي و نغرس محبة مع كل نخلة
تولد لي المحبة ببحرها نظرة مسقية
فرحوا لولاد و قالوا
يا الميمة المرضية احنا اليوم جبنا هدية
بنتك محررة مسقية من محبة العيون تشالي
شحال من يد و رجل ساقت الطريق سوق النوق
تغني بالحراير و تقول ياك الصحراء مغربية
عيطي يا بلادي و اشكي و نوحي
دقي على الحبيب و الصديق و الرفيق
لي شد معاك الطريق
و قولي مال زرعتي اليوم تنكر حليبي
و هو ما زال بين ضراسها يجري
ياك بحر الاطلس منه حضنتها بذراعي
و من رمالها نشرت ضلوعي
و قولي انا ما ولدت دراري
ما ربيت امراة ولا راجل صحراوي
مال زريعتي بغات تولي مقطوعة من الشجر غريبة
تنادي و تصيح انا ماني مغربية
أنا بوليزاريو انفصالي
خليوني ننكر جذوري خليوني
نحرق شجاري و نخيلي خليوني
نردم داري و دار ولادي و وكاري خليوني
و تقول الارض الميمة
هاذواما هم ولادي
انا زرعت لمحبة زهر فايح ما هو قطران
ما ربيت حناش في غيران
ما علمت جهل يكون بنيان
ما ربيت على تخريب و حرق بيوتي و بيوت الجيران
كيف يقول أنا صحراوي و يهد ساسو من الساس
و يقول أراك لقطيع الراس
ما يفرق بين السكين و الفاس
يحرق و يقتل بدم لغدر ولاد الناس
عيطي يا بلادي و اشكي و نوحي
قولي بالفم العامر عار واش من عار
عار واش من عار
كيف بالدم و الروح نفديها
و اليوم تولي حارقة كبدة لي ليها
قالوا ناس زمان
وياك من الذيب في القطيع
و انا نقول وإياك تسمح في بلادك راك تضيع
لي عقلوا في راسو يعرف خلاصو
و لي باع راسو ينسى اهلوا و بلادو و ناسو